«Барса» «Атлетиконың» алаңына наразы. Фликтің шағымдары Хавиді еске салды
Барселона Чемпиондар лигасының ширек финалында Атлетико Мадрид командасынан өз алаңында 0:2 есебімен жеңіліп, енді қарымта матчта камбэк жасауға тиіс. Мадридтегі ойын алдында алаң жағдайына қатысты наразылық бар, бұл тақырып бірнеше айдан бері талқыланып келеді.
Флик УЕФА өкілдерімен сөйлесті, бірақ ресми шағым болмады
Marca басылымының жазуынша, «Барселона» УЕФА-дан «Метрополитано» стадионындағы шөптің биіктігін өлшеуді сұраған: тым биік шөп доптың қозғалысын баяулатады. Регламент бойынша, оның биіктігі бүкіл алаңда біркелкі 3 сантиметрден аспауы тиіс. Ал «Барса» Камп Ноу стадионында 2,3 см биіктікте ойнайды.
Mundo Deportivo хабарлауынша, матч алдындағы жаттығу алдында «Барселонаның» бас бапкері Ханс-Дитер Флик УЕФА делегаттарына алаңның жағдайына қатысты наразылығын білдірген. Тіпті оның алаңның бір бөлігін көрсетіп тұрған сәті түсірілген.
УЕФА ережеге сай келмеген жағдайда шөпті қысқартуға дайын екенін мәлімдеді. Сонымен қатар, талаптарға сәйкес келмегенде «Барсаға» ойын алдындағы жаттығуды бұл алаңда өткізуге рұқсат берілмейтіні айтылды.
«Атлетиконың» жауабы күтілгендей болды: олардың айтуынша, алаң барлық талаптарға сай, әрі соңғы апталардағы жылы ауа райының арқасында газонның жағдайы айтарлықтай жақсарған.
Фликтің реакциясы Хавиге ұқсатылды
Cadena SER журналисі Ману Карреньо Фликтің наразылығын бұрынғы бапкер Хави Эрнандес әрекетімен салыстырды:
— Бір сәтке көзімді жұмып, Хавиді көргендей болдым. Алғашқы матчтағы төрешілікке шағымдану, қарымта ойындағы төрешілік қандай болады деп ойлану... Біз оның УЕФА өкілдерімен алаң жағдайы туралы сөйлескенін көрдік. Бұл мені таңғалдырды. Басқа бапкерлер үшін бұл ерекше нәрсе емес еді, ал Ханси Флик үшін тосын болды. Меніңше, «Барселонаның» өзіне өзі түсіріп отырған қысымы оларға пайдалы, себебі олар бұл матчтың қаншалықты маңызды екенін түсінеді.
As басылымының жазуынша, «Барселона» УЕФА-ға ресми шағым түсірмеген, тек ескерту жасаған. Ережеге сәйкес, егер төреші немесе УЕФА делегаты қажет деп тапса, алаң иесі шөптің биіктігін азайтуы тиіс. Сондай-ақ алаңды суару біркелкі жүргізілуі керек.
«Атлетико» ойыншылары да бұрын алаңды сынаған
Ақпанда «Атлетиконың» өз ойыншылары да алаңға шағымданған. Антуан Гризманн газонға көңілі толмағанын айтса, Коке «Бетиске» қарсы матчтан кейін былай деген:
— Біз бір жанасумен ойнай алмадық, алаң соған мүмкіндік бермейді. Шынымды айтсам, жағдайы нашар: біз тайып кетеміз, шөп көтеріліп кетеді... Мұндай командаға сапалы алаң керек. Бізден жоғары деңгей талап етіледі, оған сәйкес газон да жоғары деңгейде болуы тиіс.
Бұл жағдай ауа райымен түсіндірілді: Marca дерегінше, Мадридтегі жаңбыр, суық және қар алаңды бүлдірген, кей жерлері тіпті бұзыла бастаған. Соған қарамастан, маусым соңына дейін газонды толық ауыстыру жоспарланбаған.
Ақпанда Кубок ойыны алдында Флик те пікір білдірген:
— «Метрополитано» алаңының жағдайы онша жақсы емес, өйткені оны күтіп ұстау қажет. Испанияда әдетте жағдай керемет. Барлығы жақсы болады деп үміттенемін.
Алайда сол ойында «Барса» 0:4 есебімен жеңіліп, алғашқы голды қақпашы Жоан Гарсияның тайып кетуінен кейін жіберіп алған.
Екі айдан кейін «Барселона» осы стадионға чемпионат матчына қайта келді. Флик ойыншыларға:
— Бұған (алаңға) назар аудару керек екенін айттым, мүмкін бутсылардағы шиптарды өзгерту керек шығар. Олар дайын болып, бейімделуі тиіс, — деді.
Сол матчта «Барса» жеңіске жетті.
Испандық БАҚ жазуынша, шамамен 10 жыл бұрын да дәл осындай Чемпиондар лигасының ширек финалында «Барселона» Висенте Кальдерон стадионында алаңға қатысты шағым білдірген, бірақ сол кезде де жарыстан шығып қалған.
Қазір каталондықтарға «Камп Ноудағы» 0:2 есебін қайтару міндеті тұр. «Атлетико» — Флик бапкер ретіндегі ең жиі қарсыласы. Оның командалары сырт алаңда үш рет жеңіп, бір рет тең ойнаған. «Метрополитанодағы» жалғыз жеңілісі — дәл сол Кубоктағы 0:4.