Дастан Сәтпаевқа ерекше құрмет көрсету ұсынылды

Қазақстандық блогер Мұратбек Қайыржанұлы Қазақстан құрамасы мен Лондонның «Челси» клубының шабуылшысы Дастан Сәтпаевқа қатысты ерекше бастама көтерді.

Идея авторының пікірінше, 17 жастағы футболшының құрметіне мурал салынуы керек. Ол суретті Атырау қаласындағы Сәтпаев көшесі, 36 мекенжайындағы ғимаратқа орналастыруды ұсынды.

Блогер бұл орынды символикалық сәйкестікпен түсіндірді. Себебі жас қазақстандық «Челси» сапында дәл 36-нөмірлі жейдемен өнер көрсетеді.

«Бұл оның «Челсидегі» алғашқы нөміріне көрсетілген ерекше құрмет болар еді», – деді Мұратбек Қайыржанұлы.

Бастама әлеуметтік желі қолданушыларының назарын аударды. Жанкүйерлер бұл ұсынысты қызу талқылап, Сәтпаевтың мұндай құрметке дәл қазір лайық екені жөнінде әртүрлі пікір білдіруде.

Еске салайық, соңғы күндері қазақстандық шабуылшының есімі Австралияның «Вестерн Сидней Уондерерс» клубына қарсы жолдастық матчта «Челси» сапындағы алғашқы голын соққаннан кейін көпшіліктің назарында болды. Оның голының видеосы миллиондаған қаралым жинап, Қазақстанда ғана емес, шетелде де кеңінен талқыланды.